Një aksident i rëndë rrugor ka tronditur mbrëmjen e së enjtes qytetin e Durrësit, ku një automjet tip “BMW X5” ka dalë nga rruga dhe ka përfunduar poshtë Urës së Dajlanit, duke shkaktuar një bilanc tragjik me një viktimë dhe disa të plagosur.
Ngjarja ka ndodhur rreth orës 22:15, teksa automjeti po udhëtonte nga Tirana në drejtim të Fierit. Sipas të dhënave paraprake, mjeti ka qenë duke lëvizur me shpejtësi shumë të lartë, e dyshuar deri në 300 kilometra në orë, çka ka bërë që drejtuesi të humbasë kontrollin e timonit.
Si pasojë, automjeti është përplasur me barrierat anësore të urës, duke i shkatërruar plotësisht dhe duke i “marrë përpara”. Pas goditjes së fortë, makina ka “fluturuar” rreth 300 metra, përpara se të përfundonte mbi një dyqan lodrash poshtë mbikalimit.
Përplasja ka qenë fatale për pasagjeren 18-vjeçare, Vikena Greku e cila ka ndërruar jetë në vend. I plagosur ka mbetur drejtuesi i automjetit, Arbër Xhaxhaj 26 vjeç, banues në Fier si dhe dy këmbësorë, shtetasit T. T., 33 vjeç, dhe A. M., 35 vjeç, të cilët ndodheshin pranë zonës së aksidentit. Të plagosurit janë transportuar me urgjencë në spital dhe ndodhen nën kujdesin e mjekëve.
LEXO EDHE
-
-
-
Pamjet e siguruara nga vendngjarja tregojnë automjetin e bërë copash, me dëmtime të rënda në të gjitha pjesët, ndërsa barrierat metalike të urës janë çarë dhe shkulur plotësisht. Në imazhe dallohet qartë se mbrojtëset anësore nuk kanë mundur të përballojnë përplasjen e mjetit.
Për nxjerrjen e personave nga automjeti i shkatërruar është dashur ndërhyrja e forcave zjarrfikëse, të cilat kanë punuar për disa minuta mes hekurave të deformuara.
Policia e Durrësit, përmes një njoftimi zyrtar konfirmoi më herët ngjarjen dhe bëri me dije se grupi hetimor ndodhet në vendngjarje, ku po punohet për sqarimin e plotë të rrethanave dhe shkaqeve të aksidentit tragjik.
Hetimet vijojnë, ndërsa kjo ngjarje e rëndë ngre edhe një herë alarmin për shpejtësinë tej normave dhe sigurinë rrugore, veçanërisht në akse të rrezikshme urbane.
View this post on Instagram
